లైవ్ రిపోర్టింగ్‌లో ప్రమాదం.. సముద్రం ప్రమాదకరం అని చెబుతుండగానే జర్నలిస్ట్‌ను ముంచెత్తిన భారీ కెరటం.. ఇదిగో వీడియో!

స్పెయిన్‌లో ఒక టెలివిజన్ జర్నలిస్ట్ లైవ్ రిపోర్టింగ్ ఇస్తుండగా ఊహించని ప్రమాదం జరిగింది. సముద్ర తీరంలో వాతావరణం ప్రమాదకరంగా ఉందని, ప్రజలు జాగ్రత్తగా ఉండాలని హెచ్చరిస్తున్న సమయంలోనే ఒక భారీ కెరటం అతడిని బలంగా తాకి కింద పడేసింది. ఈ ఘటన మొత్తం లైవ్‌లో ప్రసారం కాగా, ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది.

వివరాల్లోకి వెళితే.. స్పెయిన్‌లోని బాస్క్ తీరంలో ఉన్న ఒండార్రోవా పట్టణంలో సముద్రం అల్లకల్లోలంగా ఉంది. ఈ పరిస్థితులపై 'ETB2' ఛానెల్ కోసం పనిచేసే జర్నలిస్ట్ సెర్జియో ఒవెజెరో ‘యూస్కాడి క్వెడేట్’ అనే కార్యక్రమంలో భాగంగా లైవ్ రిపోర్టింగ్ ఇస్తున్నారు. సముద్రపు గోడ వద్ద నిలబడి, అలల ఉద్ధృతి గురించి వివరిస్తుండగా.. అకస్మాత్తుగా ఒక పెద్ద కెరటం గోడను దాటి రిపోర్టర్‌పై విరుచుకుపడింది.

ఆ కెరటం ధాటికి సెర్జియోతో పాటు కెమెరావుమన్ రాక్వెల్ కూడా నియంత్రణ కోల్పోయి కిందపడిపోయారు. నీరు వారిని చుట్టుముట్టడంతో లైవ్ ప్రసారం ఒక్కసారిగా నిలిచిపోయింది. స్టూడియోలో ఉన్న యాంకర్ ఓడెయి ఎస్నాలా, కనెక్షన్ కట్ అవ్వడంతో ఆందోళనకు గురయ్యారు. 

అయితే, కాసేపటి తర్వాత టీవీ సిబ్బంది స్పందిస్తూ.. సెర్జియో, రాక్వెల్ ఇద్దరూ సురక్షితంగా ఉన్నారని, వారికి ఎటువంటి తీవ్రమైన గాయాలు కాలేదని ప్రకటించారు. ప్రమాదం తర్వాత జర్నలిస్ట్ సెర్జియో కూడా సోషల్ మీడియా ద్వారా తాను క్షేమంగా ఉన్నట్లు తెలుపడంతో ప్రేక్షకులు ఊపిరి పీల్చుకున్నారు.

తాను దేని గురించి అయితే హెచ్చరిస్తున్నాడో, అదే ప్రమాదానికి గురైన జర్నలిస్ట్ ఉదంతంపై నెటిజన్లు పలు రకాలుగా స్పందిస్తున్నారు. కొందరు ఆందోళన వ్యక్తం చేయగా, మరికొందరు వారు క్షేమంగా బయటపడటంపై సంతోషం వ్యక్తం చేశారు.